.png)
大家好，我係The Tingology 創辦人Freda. 非常榮幸得到香港社會企業陪鵝動力嘅邀請出席嘉賓分享會，並以「藝術陪伴」作為這次分享會的主題，同在場觀眾分享藝術如何陪伴個人情感。
為咗準備今次嘅分享會，收到題材後便馬上回想起當初接觸和諧粉彩嘅經過以及其後開始教班嘅經歷。由一開始和諧粉彩令我喺人生低潮走返出來到依家The Tingology run咗將近3年❣️ 呢個journey 對於我來說係非常不可思議 🥰
由第一次聽到和諧粉彩可以療癒心靈時只係抱住一個半信半疑嘅心態（相信課堂上聽到我講表達藝術可以療癒心靈嘅同學仔應該都有同感吧 😛）；但當時嘅我覺得試下都無妨，療癒到心靈固之然好，療癒唔到就當學習一門新技能。
就係咁 The Tingology Art Studio 不知不覺原來已踏出第一步了…
回想起，上準指課程係當時唯一能夠令我喺逆境期間抽離嘅活動，令我聆聽到自己內心嘅聲音，認清內心嘅想法。喺個段時間，我從未如此放鬆過~
估唔到和諧粉彩令我由DSE 開始已經無畫畫 到之後再重拾畫筆；亦估唔到和諧粉彩喺我人生最困難嘅時候帶返我出嚟；更估唔到嘅係和諧粉彩就此開創咗The Tingology Art Studio 之旅，再令我認識咗好多志同道合嘅朋友。一切一切嘅估唔到成就咗今天嘅我，今天嘅The Tingology Art Studio，令藝術陪伴一直伴隨著我，伴隨著The Tingology和一眾導師，令我哋一直秉持信念地走下去。我哋亦希望藝術陪伴可以伴隨著來上課嘅學生、機構嘅服務對象、學校嘅師生，或者係正在面對逆境嘅朋友。
作爲過來人，我知道面對逆境並不容易，無論係家人朋友嘅關心及慰問，抑或係藝術無聲嘅陪伴，此時此刻，「陪伴」都顯得份外重要。
好感恩當時得到身邊嘅朋友不時致電慰問，又好慶幸遇上了和諧粉彩。各方面嘅陪伴令我身心靈得到了療癒。
我明白到未必人人都咁好彩揾到完全信任嘅人並分享你嘅憂愁，但藉著藝術真的能夠讓人將內心譜寫出來。呢個係一種文字上或者言語上未必能夠表達出來嘅感覺，唯有藝術才可真切地反映到你內心嘅感受。
喺未來，The Tingology 將會繼續舉辦唔同嘅藝術課程，亦會到各區機構、學校繼續宣揚表達藝術嘅信念，令更多人透過體會表達藝術聆聽自己內心嘅聲音，靜靜地與自己內心世界交流，繼而成就最好嘅自己❤️ 再將呢份喜悅同身邊嘅人分享，傳遞下去 ❤️
就正如The Tingology 嘅vision :
❣️ 𝑨𝒍𝒘𝒂𝒚𝒔 𝒍𝒊𝒔𝒕𝒆𝒏 𝒕𝒐 𝒚𝒐𝒖𝒓 𝒊𝒏𝒏𝒆𝒓 𝒗𝒐𝒊𝒄𝒆 𝒂𝒏𝒅 𝒃𝒆 𝒕𝒉𝒆 𝒃𝒆𝒔𝒕 𝒗𝒆𝒓𝒔𝒊𝒐𝒏 𝒐𝒇 𝒚𝒐𝒖𝒓𝒔𝒆𝒍𝒇 ❣️
謝謝社企陪鵝動力嘅致謝禮物和邀請出席 【藝術陪伴：藝術如何陪伴個人情感】分享會